Liewe Lenauheimer!

Is des ke gudi Nooricht: die Lenauheimer Kerch hat im Auguscht 2014 a neies Dach kriett!

Un des wor zum Teel a de Verdinscht von eire Spende an die HOG. Die Kerch is zwar schon als „monument istoric – unner Denkmalschutz“ ausgewies un hat grad drum gude Ausssichte, a noch in de Zukunft als eeni von die auserwählte katholische Dorfkerche stehe zu bleiwe, awwer dorch Spende vun de ehemalige Lenauheimer, die in dere Kerch getaaft gen sin oder gheirat han, kenne mr a unser Teel drzu beitraan, die Kerch zu erhalle.

Un do han ich mir dann was ausgedenkt, um die Spendierwillichkeit vielleicht anzukurble : Ich schenk jedem, der was gspendet hat, e Video vun Lenauheim. Des sin ganz vill Bilder, mit gsprochene oder gschriewene Erklärunge, drzu Musik im Hinnergrund.Des ganzi geht iwwer 2 Stunne. Die Fotogschichte han ich net gekaaft, die han ich selwer gemach. Die Koschte drfier traan ich ganz alleen, eich tut des ganzi gar nix koschte, aa net die HOG. Wer an die HOG Lenauheim was spendet, kritt vun mir dann des Video, wann`r des will.

Jetz froot ihr eich, for was ich des mach?

Na, ich sen doch aa in Lenauheim groß genn. Un wie ich noh 45 Johr unser Dorf bsucht han, war ich teels verschrock iwwer de Zustand von de Heiser, teels awwer aa iwwerrascht, weil ich gsiehn han, wieviel Landsleit mit Spende mitgholf han, dass de Kerchhoff un die Kerch so gut do stehn. Domols han ich glei noh meiner Rickkehr beschämt e Spende an die HOG gemach. Un späder han ich mir gedenkt, vielleicht kann ich de Spender noch e zusätzliche Aanreiz genn, indem ich mei Arweit de Spender zur Verfiegung stell.

Ich sen jo schun im Rentealter. Do leet mr sich dann, uff neideitsch gsaat, e „ Hobby “zu ( wie wann mr net genuch drhem un mit de Enkel zu tun hätt ), awwer mr will jo aa was for die graue Zelle mache. Un do han ich bei meim Schwoger Horst, des is de Mann von meiner Schwester Arnhild, gsiehn, wie scheen der uns ihre Urlaubsbilder gezeigt hat. Die Bilder han sich bewegt un ware ganz groß am Fernseher zu gsiehn, drzu hat`r sei Dischput geredd un Musich war aa noch zu heere. No han ich gsaat : „ Des mecht ich aa lerne“. Also is mei Schwoger zu mir hem kumm, denn des muss mr am Compjuter mache, un hat mr mol gezeigt, was zu tun is. Des is`m so leicht vun dr Hand gang, das ich jo net geahnt han, was ich mr do angfang han, un wieviel Zeit ich drfier brauch. Un als ichs gemerkt han, war ich schon mittedrin. Un jede Taach han ich e Kampf mit dr Technik ausfechte misse. Meischtens hat dr Comjuter gesiegt.Was soll ich eich saan- ich han sogar oftmols kapituliere misse, denn mei Compjuter hat gar nix me gemach, ausser dass er mr de totale „Kresch“ angsaat hat. Ich han mei Sohn um Hilf gbitt, awwer der hat gleih abgewunk un hat gsaat : „ Mutter, do muscht du selwer dorch, dazu brauch mr Zeit un Geduld, die hascht du meh wie ich ,mach nor weider, dann kummscht schun selwer uff die Kniffe un die Tricks druff. Mit de neetiche Technik, die du brauche werscht, kann ich dr helfe, awwer die Arweit muscht ganz alleen mache.“

Des han ich jetz drvon ghatt! Awwer – ich sen jo e Schwowin um mir Schwowe han doch vun kleen uff gelernt, uns iwwerall selwer zu helfe. Ich han noch meiner Omma ihre Wort em Ohr: „Hilf dir selbst, so hilft dir Gott !“ Also han ich weider gemach.

Un wann ich nimmi weider gewisst han, han ich mei Schwoger angeruf und han `m gschildert, was for e Dorchenanner ich angstellt han. Der hat mr dann telefonische Ratschläch gin un irgendwann han ich des Arweide kapiert. Es hat sich awwer rausgstellt, dass ich ständich was uff-rischte han misse : mal e bessere Liftung, dann e neies Mikrofon, dann e annere Brenner, dann e besseres Programm, dann e neies Betriebssystem. Des hat mei Sohn dann noh un noh gmach. Dann wor ich widder mit`m Compjuter alleen. Inzwische han mr uns dann immer besser vertraan -der Compjuter un ich.

Noher, wie ich die fertich gebrennte, silwerne Scheiwe in de Hand ghall han, hat mr des doch net gfall – ich wollt se aa so scheen färwich, wie die gekaafte. Also han ich widder neie Technik lerne misse, um so scheene Bilder uff die Scheiwe un uff die Umschläch zu mache.

Dann hat mich e neies Problem erwischt. Mr derf jo net jedi gekaafte Musik inbaue, un die , was mr verwenne kann, is jo net immer nach Wunsch. Ich han gsucht und gsucht, bis ich mol eenigermaße passende Musich bestelle han kenne. Awwer uff manche Lieder wollt ich net verzichte und weil ich die nirgends gemafrei krit han, han ich mich noch selwer zum Aff gemach un han mit meiner alde Stimm zwoostimmich gsung un Musich drzu gemach. Zum Glick net so oft.

Awwer froot net, wievill mei Partner hat zruckstecke misse in dere Zeit, un wievill Arweit im Haushalt er mr abgenomm hat. Wann er mal am Comjuter was schaue wollt, gings net, -der war vun mir bsetzt, wollt er am Fernseher was schaue, is de aa net gang, weil dort han ich die selwer gebrennte Scheiwe em Schnelldurchlauf absolwiere misse, um zu schaue, was draus worre is. Un wann ich mit`m Mikrofon gearweit han, hat `r staad sen misse wie e Meis `che. ( Also is ihm jo gar nix annres iwwrich geblieb, wie zu schaue, wo er sunscht was in dr Wohnung mache kennt ). Jedenfalls han mei Blumme in dem Sommer unter de Obhut vum Mathias so scheen geblieht, wie selten. Awwer – es war e harti Zeit vor `ne. Ich glaab, wann es Esse, trotz alle Widrichkeite, net pinktlich uff em Tisch gstann hätt, hätts aa mol dicki Luft gen.

Wann ihr also neigierich seid, was ich eich vun Lenauheim zeige will, no misst `r schun was spende an die HOG. Des kummt zu 100% in die näckschte Renovierunge rin. Bei mir misst ihr eich gar net melle. Also losst eich des mol dorch de Kopp gehn. Ihr tut e gudes Werk un kennt vielleicht schun an Weihnachte mit dr ganzi Sippschaft alles anschaue un iwwer Lenauheim redde . Noh Weihnachte mach ich erscht mol Paus. Lasst aa eire Enkel mitschaue- for die solls jo aa e Lehrstunn sen. Un wann die die technische Bedienung iwwernehme kenne, han se aa e Lob verdient. (Ich denk halt immer noch wie e Lehrerin, denn des war ich jo).

Also losst`s eich gut gehen, bleibt gsund un vergesst die aldi Heimat net.

Ich grieß eich scheen!

Heidrun Hockl