Uf dr heed saat mer: Wer dorch Schadat fahrt ohne gfoppt un dorch Grawatz ohne gekloppt, der is a Mann!
Do hat sich in Schadat mol folgendes zugetraa: Mei Grossvater is während’m Dresche uf Mariafeld gfahr Wein hole, un sei Nochberschleit han gsaat, er soll aach for sie mitbringe. Er hat Fässer uf de Waan getun un is gfahr. Das er net ‚illenich fahrt, hat er de Vedder Toma mitghol.
Wie se zruckkomm sen, no ware se schun e bissl angetrunk, un wie se durch Grawatz fahre, saat de Vedder Toma: „Wescht was? Mir bleiwe do im Wertshaus stehn un trinke zwaa Flasche Bier, no were mr nichter.“ Wie se getrunk han, hat mei Grossvater sich so gsitzt, dass er uf die Peer gsieht. Ufmol sieht’r, wie drei Buwe e 50-Liter-Fass voll wein vum Waan ghol han. Er hat nix gsaat, hat sich awer gedenkt: Wart nor, eich krien ich schon! Er saat: „Toma, komm, mir fahre glei.“ Er macht die strick an un fahrt los. Do rufe die drei aus’m Wertshaus ihm no: „Hans-Vedder, hat dihr aach eire Fässer gezählt?“ ei Grossvater hat nix gsaat un is hemgfahr.
In Schadat ankomm, hat er e Liter Wein ghol un is zum Wachtmeister gang. Wie der de Wein verkost, saat er: „Des is e prima Wein!“ Do saat mei Grossvater, er hat dervun un wollt mit ihm e Gschäft mache. Un er frot: „Wie nennt mr des, wann mer jemand e Fass Wein vom Waan holt?“ Druf de Wachtmeister: „Des is Diebstahl!“ Dann verzählt mei Grossvater die Sach mit’m Weinfass, un sat zum Wachtmeister: Des Fass will ich han, de wein, wo drin is, von dem nämlichi, wo ich do in de Flasch han, un mit dem kennt ihr mache, was der wollt. Kepplt eich mol die drei vor!“
De Wachtmeister war aach kener von deni, die de Wein in de Grawe gschitt han; un er is glei niwer uf Grawatz gfahr, hat die drei Helde hopghol, hat ne Handschelle angezoo, un hat se samt dem Fass Wein hemgebrung, hat se bissl verkloppt un Strof zahle gemach un no han se hemgehn kenne. Am anre Tach kommt de Wachtmeister un saat: „Hans-Vedder, so kennt ihr mir jede Tach komme.“
Wie mei Grossvater no nochmol mit de drei zammkomm is, aht er gelacht un gsaat: „In Grawatz hat dihr mich gfoppt, awer in Schddat han se eich gekloppt.“ Awer die drei han gspauzt!
- Erzählt von Peter Altmayer aus Lenauheim
- Aufgezeichnet von Horst Geyer
- Zur Verfügung gestellt durch Franz Hirth